Պերմյակովն առողջ է եղել, սիրել է շանսոն, աղջիկներին մաստակ է նվիրել. Փորձաքննություն

Գյումրիում տեղակայված ռուսական 102-րդ ռազմաբազայի տարածքում այսօր շարունակվող Ավետիսյանների սպանության գործով արտագնա դատական նիստում հրապարակվել են 26 հատորանոց գործի նյութերում առկա փաստաթղթերը:

Մասնավորապես, հրապարակվեցին գործով մեղադրյալ ռուս զինծառայող Վալերի Պերմյակովի մասին համադասարանցիների միանման կարծիքները՝ «ուրախ էր, բարի էր, միշտ ժպտում էր, համեստ էր, աղջիկներին մաստակ էր բերում»: Դասատուներն էլ ասել են Պերմյակովը եղել է հանգիստ, չնախաձեռնող:

Այնուհետև հրապարակվել է բժշկահոգեբանական հետազոտության փորձաքննության փաստաթուղթը, որի համաձայն, Պերմյակովն «իրեն հանգիստ է պահում, բավականաչափ վստահ է: Շփման ժամանակ բարեհամբյուր է, բարեկիրթ, կոռեկտ պատասխանում է իրեն ուղղված բոլոր հարցրեին:

Ընդհանուր առմամբ, էմոցիոնալ ռեակցիաները ադեկվատ են, երբեմն ժեստային շարժումներ է անում, բառապաշարը սահմանափակ է, բայց մտքերը կազմում է հեշտորեն: Իրեն համարել է ֆիզիկապես և հոգեպես առողջ մարդ: Սիրում է շանսոն լսել»:

Ըստ նույն փորձաքննության եզրակացության, Պերմյակովի մոտ քրոնիկ հոգեկան խանգարման հատկանիշներ, ժամանակավոր հոգեկան խանգարում, տկարամտություն այս ժամանակահատվածում չեն հայտնաբերվել:

«Պերմյակովն իրեն մեղսագրվող հանցանքի կատարման ընթացքում չի գտնվել հոգեկան խանգարման վիճակում և դա հաստատում է իր նպատակաուղղված գործողությունների բնույթը: Նա կարող էր գիտակցել իր գործողությունների հասարակական վտանգավորության աստիճանը: Նա չի գտնվել աֆեկտի կամ այլ էմոցիոնալ վիճակում, իրեն մեղսագրվող հանցանքի կատարման ընթացքում նրա գործողությունները կրել են հետևողական բնույթ», -նշվել է փորձաքննության եզրակացության մեջ, որը հրապարակվեց դատարանի դահլիճում:

Նաև նշվեց, որ նա պիտանի է եղել զինվորական ծառայության համար: