Ե՛վ վարչապետը, ե՛ւ քաղաքական թիմի վերնախավը պատշաճ պատասխաններ կտան. Լուլուն` Ծառուկյանի դեմ հիմա քրհետապնդում սկսելու մասին

Ազգային ժողովում երեկ ամենահետաքրքրականը, թերեւս այն էր, թե ինչպես է ՀՀ գլխավոր դատախազի միջնորդության համաձայն` ԱԺ ԲՀԿ խմբակցության ղեկավար Գագիկ Ծառուկյանի նկատմամբ քրեական հետապնդում հարուցելուն, ապա նրան ազատությունից զրկելուն համաձայնություն տալու վերաբերյալ փակ, գաղտնի քվեարկության ժամանակ քվեարկելու ԱԺ «Իմ քայլը» խմբակցության պատգամավոր ԼՈՒՍԻՆԵ ԲԱԴԱԼՅԱՆԸ: Նույն ինքը` Լուլուն, որը, որպես հաղորդավար, ոչ միայն աշխատել է Գ. Ծառուկյանի հետ առնչվող «Կենտրոն» հեռուստաընկերությունում, այլ նաեւ վարել ծառուկյանական մի շարք բարեգործական միջոցառումներ: Մինչդեռ շատ հանգիստ նա կողմ քվեարկեց, այդ մասին է հուշում ներկա իմքայլականների միաձայն քվեարկության արդյունքները, ինչի մասին էլ ծավալվեց «Իրավունքի» զրույցը նրա հետ:

«ՄԻ ՄԵԾ ՈՂԲԵՐԳՈՒԹՅՈՒՆ ՍՐԱՆԻՑ ՍԱՐՔԵԼՈՒ ԿԱՐԻՔ ՉԿԱ»

– Տիկին Բադալյան, շատերը ենթադրում էին, որ Ձեր քվեարկությունը կարող է տարբերվել Ձեր քաղաքական թիմի մյուս անդամների քվեարկությունից` նկատի ունենալով, որ ժամանակին համագործակցել եք Գ. Ծառուկյանի հետ: Ի՞նչ կասեք այս մասին:

– Չեմ կարծում, որ համագործակցությունը` այն էլ մասնագիտական ասպարեզում, պետք է իրավական գործընթացի վրա ճնշում գործադրի: Այստեղ խնդիրը ո՛չ պատգամավորական մանդատից զրկելու հարց է, ո՛չ էլ որեւիցե այլ հարց: Մենք քննարկել ենք անձեռնմխելիությունից զրկելու հարցը, որպեսզի իրավական գործընթաց սկսվի, որը կարող է ապացուցել կամ չապացուցել պատգամավորի մեղքը: Չապացուցելու դեպքում` պատգամավորը ետ է վերադառնում, եւ բոլորս ծափերով հետ ենք ընդունում: Այսինքն` մի մեծ ողբերգություն սրանից սարքելու կարիք չկա, եւ առավել եւս կարծում եմ` ինչ-որ տեղ ուշացնելը տարբեր ենթադրությունների տեղիք է տալիս այն դեպքում, երբ կարելի է ուղղակի իրավական գործընթացը սկսել եւ այդպիսով պարզել` մարդը մեղավո՞ր է, թե` անմեղ: Անմեղության կանխավարկածն ընդհանրապես պետք չէ բացառել: Զուտ դրա համար կարծում եմ, որ մասնագիտական համագործակցությամբ որեւէ բան այսպիսի հարցերի վրա չպետք է ճնշում գործադրի, այլապես ի՞նչ է փոխվել, կստացվի, որ ոչինչ չի փոխվել:

– Բազմաթիվ հարցեր ու ելույթներ եղան ինչպես ԲՀԿ-ի, այնպես էլ ԼՀԿ-ի կողմից: Ինչո՞վ էր պայմանավորված «Իմ քայլի» լռությունը: Չունեի՞ք այդ հարցադրումների պատասխանները:

– Կարծում եմ` հարցադրումներին կլինեն պատասխաններ, այսինքն` իշխող խմբակցությունը չի պատրաստվում մինչեւ վերջ լուռ մնալ: Ինքս էլ ցանկանում էի ելույթ ունենալ: Ինձ օրինակ ամենից շատ անհանգստացրեց, թե այդ ինչ պետք է լինի, որ նմանատիպ իրավական գործընթացի նկատմամբ քաղաքական տարբեր խավեր ներքաշելու համար` քաղցկեղով հիվանդ երեխաների «Սիթի օֆ սմայլ» հիմնադրամի, որի հոգաբարձուների խորհրդի անդամ եմ նաեւ ես, հարցը շահարկեին: Ի՞նչ կապ ուներ մեկը մյուսի հետ: Ի՞նչ կապ ուներ այդ գործունեությունը այն ամբողջ գործընթացի հետ, որը ծավալվել էր Ազգային ժողովում: Սա նշանակում է, որ քաղաքական մանիպուլիացիաներն արդեն այն աստիճան խորն են եւ այն աստիճան տարօրինակ, որ կարող են ցանկացած բանի վրայով անցնել, միայն թե այդ պահին ինչ-որ ազդեցիկ բան ասեն: Զուտ դրանից եմ շատ զայրացած, իսկ մնացած հարցերի պատասխանները, իհարկե, խմբակցությունը կտա:

«ՄԵԾ ՄԵՂՔ ՉԵՍ ԿԱՐՈՂ ԱՅԴՏԵՂ ՓՆՏՐԵԼ»

– Իսկ Դուք հարցեր չունե՞ք Ձեր քաղաքական թիմին, օրինակ, թե ինչո՞ւ է կորոնավիրուսի դեմ պայքարը թողած` ՀՀ առողջապահության նախարար Արսեն Թորոսյանը զբաղված ինչ-որ նախաքննական փաստաթղթեր հրապարակելով: 

– Ուղղակի մի տեսանկյունի վրա կցանկանայի ձեր ուշադրությունը հրավիրել, որ առողջապահության նախարարը «Քաղաքացիական պայմանագիր» կուսակցության վարչության անդամ է, այսինքն` նա ոչ թե որպես առողջապահության նախարար է հրապարակել, այլ որպես քաղաքական թիմի անդամ:

– Այն ժամանակ երբ երկրում արտակարգ դրություն է ու աղետալի վիճակ` կորոնավիրուսի հետ կապվա՞ծ:

– Սրա մասին ամեն մեկս կարող ենք ունենալ մեր կարծիքը: Բնականաբար, ես էլ ունեմ իմ կարծիքը, այլ հարց է, թե ես այդ դեպքում ինչպես կվարվեի, դուք այդ դեպքում` ինչպես, բայց այնուամենայնիվ, մեծ մեղք չես կարող այդտեղ փնտրել:

– Ձեզ նման փաստաթղթեր չէի՞ն տվել կիրակի օրով, որ Դուք էլ հրապարակեիք:

– Ոչ, բացարձակապես: Ընդհանրապես` չեմ կարծում, որ ինչ-որ մեկին հատուկ ինչ-որ փաստաթուղթ են տվել եւ ասել` սա պետք է տարածել: Գրեթե բացառում եմ այսպիսի բան:

«ԵԹԵ ԻՆՉ-ՈՐ ՄԻՋՈՑԱՌՄԱՆ ԵՆ ՄԱՐԴԻԿ ՄԱՍՆԱԿՑՈՒՄ, ՈՒՐԵՄՆ` ՎԵ՞ՐՋ»

– ԱԺ ԼՀԿ խմբակցության ղեկավար Էդմոն Մարուքյանը հիշեցնում էր «Իմ քայլին», որ  հուշագիր ունեք ստորագրած Գագիկ Ծառուկյանի հետ, որ Նիկոլ Փաշինյանը մասնակցում էր Ծառուկյանի դստեր հարսանիքին: Այս ամենի վերաբերյալ երբեւէ Ձեզ մոտ հարց չի՞ ծագել նախկինում:

– Հարցեր միշտ էլ կան, բայց ես ուրիշ բան եմ ուզում ասել` եթե ինչ-որ մի միջոցառման մարդիկ մասնակցում են, ուրեմն` վե՞րջ, դրանից հետո այլեւս եթե այդ միջոցառման մասնակիցներից մեկը, ենթադրենք, ինչ-որ մեղք գործի, խոսքը պարոն Ծառուկյանի մասին չէ, միայն նրա համար, որ դու հուշագիր ես ստորագրել ժամանակին կամ ինչ-որ իրադարձության ես մասնակցել, պետք է ա՞չք փակես:

– Բայց Նիկոլ Փաշինյանը միշտ է խոսել ընտրակաշառքների մասին, նոր իմացա՞ք, որ ԲՀԿ-ն ընտրակաշառք է բաժանել: Երբ գնում էր Ծառուկյանի դստեր հարսանիքին, այդ ժամանակ չգիտեի՞ք:

– Սա այլ հարց է: Ոչ, իհարկե, նոր չիմացա: Բայց այստեղ հարցն այն էր, թե ում հետ էր ամուսնանում Գագիկ Ծառուկյանի զավակը, եւ այնտեղ կան բազմաթիվ հարաբերություններ` ընկերական, ոչ քաղաքական: Մենք մի քիչ խորն ուսումնասիրությունների կարիք ունենք նմանատիպ հարցերում: Ի՞նչ անել նորմալ հարաբերությունների դեպքում, միշտ մտածել, որ վաղը կարող է ինչ-որ բա՞ն լինի, այսպես ուղղակի չի լինի ապրել: Այսինքն` եթե այս պահին ամեն ինչ նորմալ է, նորմալ համագործակցություն է գնում, չկան հանցագործություներ, ուրեմն` պետք է հարաբերություններն այդ հարթության վրա դասավորվեն: Իսկ եթե իրավիճակը փոխվում է, կամ ինչ-որ նոր բան է բացահայտվում, ապա այստեղ կա պատասխանատվություն երկրի նկատմամբ, եւ դու պարտավոր ես մի կողմ դնել քո մնացած բոլոր քայլերը, որ մինչ այդ ձեռնարկել ես եւ զբաղվես կոնկրետ հանցագործությամբ: Եթե չկա հանցագործություն, նորից եմ կրկնում` շատ լավ է, թող արագ այս իրավական գործընթացն ավարտվի, ներողություն կխնդրեն եւ ետ կվերադարձնեն Ազգային ժողով: Կարծում եմ`  մի քիչ շատ ենք մեծացրել այս հարցը:

«ԱՅԴ ԿԱՆԱՅՔ ԽԵԼՈՔ ԿԱՆԳՆԱԾ ԷԻՆ, ՈՍՏԻԿԱՆՆԵՐԸ ՀԵՆՑ ԱՅՆՊԵՍ ԵԿԱՆ ՔԱՇՔՇԵՑԻՆ, ԾԵԾԵՑԻ՞Ն...»

– Իսկ ինչպե՞ս եք վերաբերվում կիրակի օրը ԲՀԿ-ական կին պատգամավորների նկատմամբ ոստիկանության դրսեւորած վարքագծին: Իրավաչա՞փ էր, թե՞ ընդունում եք, որ բռնություն է կիրառվել կին պատգամավորների նկատմամբ:

– Կարծում եմ, որ ընդհանուր առմամբ` այս անգամ ոստիկանությունը բավականին գրագետ էր գործում եւ ինչպես միշտ է պետք գործել: Նախ ես ընդհանրապես դեմ եմ կին եւ տղամարդ քաղաքական գործիչներին իրարից առանձնացնելուն, առավել եւս դեմ եմ, որ երբ մեզ ձեռնտու է, մոռանում ենք, որ կին է, եւ երբ մեզ ձեռք է տալիս, որ հիշենք, որ կին է, հիշում ենք: Այդ կանայք խելոք կանգնած էին ու ոչ մի բան չէին խախտել, ոստիկանները հենց այնպես եկան քաշքշեցին, ծեծեցի՞ն...

– Այսինքն` նորմալ եք համարում, որ պատգամավորին փողոցում ոստիկանները կարող են քաշքշե՞լ...

– Փողոցում պատգամավորներին քաշքշելն իհարկե նորմալ չեմ համարում: Բայց կարծում եմ` սա էլ ունի առանձին քննության կարիք: Եթե ոստիկանությունը արել է մի բան, որը նրան թույլատրված չէր, ապա ոստիկանությունը պետք է ներողություն խնդրի եւ կոնկրետ ոստիկաններն էլ պատժվեն: Իսկ եթե ամեն ինչ իրավաչափ է եղել, ապա այս դեպքում ուղղակի պետք է թողնել այնպես, ինչպես կա, որովհետեւ կարծում եմ, որ օրինական դաշտում չէ նման ակցիաներ կազմակերպելը արտակարգ դրության պայմաններում: Թող որեւիցե մեկը չասի, որ ինքնաբուխ էր, անհրաժեշտ ինչ-որ մի բան էր: Ի՞նչն էր անհրաժեշտ, իրավական գործընթաց է տեղի ունենում: Եթե մարդը անմեղ է, եւ եկել են ոստիկանները հետախոզություն են անցկացնում, այս դեպքում կարծում եմ` իմաստ չուներ այդ ամենն անել, իսկ գուցե զուտ մեղավորությունից շեղելու համա՞ր էր արվում:

– Ինչո՞ւ հիմա Գագիկ Ծառուկյանի դեմ քրեական հետապնդում սկսվեց, հնարավոր չէ՞ր դա անել մեկ տարի առաջ, ավելի շուտ կանխել, եթե իսկապես եղել է հանցանք:

– Այ սրա պատասխանը ես չունեմ: Կարծում եմ` այդ հարցի հասցեատերն էլ, որոշողն էլ ես չեմ: Այս դեպքում կարծում եմ, որ ե՛ւ վարչապետը, ե՛ւ քաղաքական թիմի վերնախավը, հիմնական կորիզը պատշաճ պատասխաններ կտան, ինչպես հիմնականում պատասխաններ տալիս է եւ փորձում հնարավորինս թափանցիկ գործել:

– Փաստորեն, հարցի պատասխանն այնուամենայնիվ քաղաքական տիրույթում է...

– Ըըը... չէ, այդպես չասացի, ես ասացի պատասխան կտան նրանք, ովքեր սկսել են գործընթացը կամ նպաստել են գործընթացը սկսելուն: Այդ պատասխաններն ունեն իրենք, ես այդ պատասխանը չունեմ, չեմ կարող տալ:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝