Յուրաքանչյուրն իր խղճի առաջ պետք է պատասխան տա. Շաքե Իսայան

Ազգային ժողովում երեկ ՀՀ գլխավոր դատախազ Արթուր Դավթյանի միջնորդությամբ քննարկվեց ԱԺ ԲՀԿ խմբակցության ղեկավար Գագիկ Ծառուկյանի նկատմամբ քրեական հետապնդում հարուցելուն, ապա նրան ազատությունից զրկելուն համաձայնություն տալու վերաբերյալ միջնորդագրերը: Փակ քվեարկությանը չմասնակցեցին ԲՀԿ-ն ու ԼՀԿ-ն, իսկ «Իմ քայլը» գրեթե միաձայն կողմ քվեարկեց (չհաշված բացակա երկու պատգամավորներ Սասուն Միքայելյանի եւ Թագուհի Թովմասյանի): Թե ստեղծված իրավիճակում, որոնք են լինելու ԲՀԿ-ական պատգամավորների հետագա քայլերը, «Իրավունքը» հետաքրքրվեց ԱԺ ԲՀԿ խմբակցության պատգամավոր ՇԱՔԵ ԻՍԱՅԱՆԻՑ:

- Երեկ ամեն ինչ արվեց, որպեսզի հենց այդ օրը ձերբակալումը տեղի ունենար:  Կանխազգալով եւ կանխատեսելով այս ամենը` մի քանի սցենարներ ունենք մտածված: Մենք առաջիկայում մեր բոլոր քայլերի մասին կտեղեկացնենք: Իհարկե, զուգահեռ հաղորդումներ ենք պատրաստում մի քանի ուղղություններով, ինչի մասին եւս հավելյալ կտեղեկացնենք:

– Տիկին Իսայան, Ձեր ԲՀԿ-ական գործընկերները երեկ ԱԺ ամբիոնից արված իրենց ելույթներում ասում էին, որ «Իմ քայլ»-ում ազնիվ, բարոյական կեցվածք ունեցող ընկերներ ունեն: Սպասելի՞ էր Ձեզ համար, որ 86 իմքայլական` անկախ պատգամավոր Արման Բաբաջանյանն էլ հետները, կողմ քվեարկեն Գ. Ծառուկյանին անձեռնմխելիությունից զրկելուն:

– Միանշանակ սպասելի էր: Իհարկե, որեւէ մեկին չեմ ուզում վիրավորել եւ պիտակավորել, բայց կոնկրետ ինքս իմ խոսքում որեւէ մեկին չեմ դիմել: Ես իրապես դիմել եմ միայն ժողովրդին, ՀՀ քաղաքացիներին: Այո՛, շատ նեղ զրույցներում գործընկերներից եւս ահազանգում էին, որ այլ տարբերակ չունեն, որովհետեւ «Իմ քայլին» հրահանգված էր ամեն գնով կողմ քվեարկել այս ամեն ինչին: Ինչեւէ, թող ինձ ներեն, բայց անգամ այդ հրահանգողներին չեմ մեղադրում, յուրաքանչյուրն իր խղճի առաջ պետք է պատասխան տա:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝