ՈՍՏԻԿԱՆՈՒԹՅՈՒՆԸ ՍՐԱ՞Ն Է ՓՈՐՁՈՒՄ ՍՏՈՐԱԲԱՐ ԾԱՌԱՅԵՑՆԵԼ ՕՐՎԱ ՌԵԺԻՄԻՆ. ՍԱՅԱԹ ՇԻՐԻՆՅԱՆ

«Իրավունքի» զրուցակիցն է ՀՀ ոստիկանության հասարակայնության հետ կապի եւ լրատվության վարչության նախկին պետ, գնդապետ ՍԱՅԱԹ ՇԻՐԻՆՅԱՆԸ: Ում հետ զրուցել ենք ոստիկանության ներկայիս իրավիճակի եւ առկա խնդիրների մասին, չշրջանցելով նաեւ գնդապետի ավտոտնակի մոտ «Իրազեկ քաղաքացիների միավորում» ՀԿ-ի ղեկավար Դանիել Իոաննիսյանի կողմից հրահրված միջադեպը:

ԱՊԱՇՆՈՐՀ ԵՆ, ԱՊԻԿԱՐ, ՉԵՆ ԿԱՐՈՂԱՆՈՒՄ ԵՐԿԻՐԸ ԿԱՌԱՎԱՐԵԼ

– Պարոն Շիրինյան, Դուք կարծես երբեւէ, համենայնդեպս հանրայնորեն, որեւէ մեկին չեք քննադատել: Բայց Դանիել Իոաննիսյանի կողմից հրահրված միջադեպից րոպեներ անց սկսվեց Ձեր անձի ֆեյքային թիրախավորում, ինչո՞ւ:

– Շատ ճիշտ նկատեցիք, ես եթե անգամ ֆեյսբուքյան գրառումներ արել եմ, որոշակի քննադատություններ եղել են, դա եղել է իմ սուբյեկտիվ կարծիքը: Ես չեմ ներկայացրել որեւէ կուսակցության, որեւէ խմբավորման կարծիք: Դե, բնականաբար, ներկայիս իշխանությունները, քանի որ ապաշնորհ են, ապիկար են եւ չեն կարողանում երկիրը կառավարել, շատ ծանր են տանում քննադատությունները: Փաշինյան Նիկոլը, երբ ինքը ղեկավարում էր «դեղին մամուլը», տեղի-անտեղի բոլորին քննադատում էր, թիրախավորում եւ անհիմն ցեխ էր շպրտում: Այսօր էլ, իշխանավոր լինելով հանդերձ, էլի բոլորի վրա ցեխ է շպրտում: Ի տարբերություն իրենց, ես օբյեկտիվ քննադատություն եմ արել, այո, դա եղել է իմ սուբյեկտիվ կարծիքը, բայց՝ հիմնավոր: Եթե այսօր ոչ բարով երկրի ղեկավարին մեղադրում են ծխախոտի ապօրինի վաճառքի, ադամանդների ապօրինի ներկրման մեջ, եւ այդ մարդը ասում է՝ ուզում եք հավատացեք, ուզում եք` չէ, էդ մարդուց էլ ի՞նչ սպասել: Դու երկիր ղեկավարն ես, դու պարտավոր ես: Սա էլ չեղա՞վ էն, որ գնաս հասնես Ֆրանսիա եւ Քոչարյանի հասցեին ասես, որ հանցագործ է, հետո անամոթաբար գաս, մտնես դատարան եւ ներկայացուցչի միջոցով ասես, որ իրեն նկատի չես ունեցել:

– Պարոն Շիրինյան, ի դեպ, Ձեր կոչումն էլ ոմանք փորձեցին այլ լույսի ներքո ներկայացնել` համարելով Ձեզ «Քոչարյանի ժամանակվա գնդապետ»:

– Պետք է նախեւառաջ ասեմ, որ ես Քոչարյանի օրոք եղել եմ փոխգնդապետ, գնդապետի կոչումը ստացել եմ 2008 թվականի հունիս-հուլիս ամիսներին, այն էլ, երբ հերթական կոչման ժամանակս անցել էր: Ընդ որում, գնդապետի կոչումը ես ստացել եմ ոստիկանության գերատեսչության ղեկավարի կողմից եւ ոչ երկրի ղեկավարի հրամանագրով. երկրի ղեկավարը տալիս է միայն գեներալի կոչում: Ցավոք, ես գեներալի կոչում չունեմ, թեեւ եթե նախագահ Քոչարյանի ժամանակ գեներալ դարձած լինեի, դա ինձ համար մեծ պատիվ կլիներ:  

ԻՇԽԱՆՈՒԹՅՈՒՆՆԵՐՆ ՈՒԺԱՅԻՆ ԿԱՌՈՒՅՑՆԵՐԸ ԿԱԶՄԱՔԱՆԴՄԱՆ ԵՆ ՏԱՆՈՒՄ

– Որպես երկար տարիներ ոստիկանության համակարգում ծառայած անձնավորություն, գնդապետ, համակարգը ներսից լավ իմացող անձ, ինչպե՞ս կգնահատեք ոստիկանության ներկայիս վիճակը:

– Ինչպես իմ ծառայած տարիներին, այնպես էլ այսօր ոստիկանության համակարգում կան շատ արժանավոր եւ պատվախնդիր ոստիկաններ: Եվ հենց այդ պրոֆեսիոնալ, պատվախնդիր ոստիկանների գոյությունը համակարգում բավականին լուրջ զսպաշապիկ է, որ համակարգը չքանդվի:  2018 թվականին, երբ բոլորը ոգեւորված հեղաշրջման ժամանակ գոռում էին` «ոստիկանը մերն է, ոստիկանը մերն է», դա ամենեւին չէր ենթադրում, որ եթե ոստիկանը իրենցն է, ուրեմն ինչպես ուզեն, նրա հետ կարող են վարվել: Սրանք հիմա փորձում են ստորաբար, սրիկայաբար ոստիկանությունը ծառայեցնել օրվա ռեժիմին: Ներկա իշխանությունները ոստիկանությանը առ ոչինչ են ուզում դարձնել: Հասել եք նրան, որ ԼԳԲՏ-ականները մտնում են ոստիկանության կենտրոնական բաժին, ոստիկան են ծեծում,  ոստիկան է հոսպիտալացվում, բայց դրանք մնում են անպատիժ: Բա ո՞նց աշխատեն այս ոստիկանները, եթե նրանց ոսկյա սկուտեղով զոհասեղանին են մատուցում: Կամ` ո՞վ է ինչ-որ անհայտ ծագումնաբանությամբ Վարդգես Գասպարին, որ ծառայողական պարտականությունները կատարող ոստիկանին կարողանում է ասել «համբալ» եւ մնում անպատիժ: Սա՞ է Ձեր իրավական պետությունը, սրա համա՞ր էիք գոռում «դմփ-դմփ-հու»: Ինչո՞ւ եք նսեմացնում, ստորացնում պետության հենասյուներին` ԱԱԾ-ին եւ ոստիկանությանը: Այս իշխանություններն ուժային կառույցներին կազմաքանդման են տանում: Հասարակ օրինակ, ո՞վ է Դանիել Իոաննիսյանը, որ դուք ոստիկան եք կցել նրան: Այսօր լրատվամիջոցների դերն ու նշանակությունը շատ ավելի մեծ է, բայց եթե Դուք դուրս գաք ռեպորտաժ պատրաստելու, Ձեզ ոստիկան կկցե՞ն. իհարկե՝ ոչ:

– Պարոն Շիրինյան, որպես ՀՀ ոստիկանության հասարակայնության հետ կապի եւ լրատվության վարչության նախկին պետ, ինչպե՞ս կգնահատեք տվյալ վարչության ներկայիս աշխատանքը: Հաշվի առնելով, որ մամուլում բազմաթիվ են այդ կառույցի վերաբերյալ փաստարկված հրապարակումները, որ զբաղված են ոչ թե իրենց վերապահված գործառույթներն իրականացնելով, այլ շատ հաճախ` տարբեր ֆեյք խմբավորումների կողմից իրենց «ձեռքի տակով» չանցած լրագրողներին եւ լրատվամիջոցներին «սեւացնելու» գործով:

– Հասկացա Ձեր հարցը, բայց թույլ տվեք այն չմեկնաբանել: Քանի որ ես այդ կառույցի ղեկավարն եմ եղել 7 տարի շարունակ, ճիշտ չեմ համարում որեւէ խոսք ասել: Ես, համենայնդեպս, կլռեմ: Կա հասարակության կարծիք, կա լրատվամիջոցների վերաբերմունք: Հիմա կոռեկտ չեմ համարում պարզապես գնահատական տալ այն կառույցի վերաբերյալ, որը ես եմ ղեկավարել:

Զրույցը` ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝