Սոցփաթեթի շահառուները` նոր խնդրի առաջ. «Հիվանդանոցներում տեղ չկա»

«Իրավունք» թերթի խմբագրություն էր զանգահարել սոցփաթեթի շահառուներ, որոնց պոլիկլինիկայի ուղեգրով արդեն մեկ շաբաթի ավելի է, չեն կարողանում հորմոնների անալիզ եւ դուպլլեքս կատարել: Մի քանի բժշկական կենտրոններ նրանց ասել են` լիմիտը վերջացել է: Պարզաբանում ստանալու համար դիմեցինք  առողջապահության նախարարություն, որտեղից մեզ  տեղեկացրին, որ  առողջապահական բաղադրիչի հետ կապված այս պահին իրականացվում է հերթագրում, առկա է ֆինանսական փոխհատուցման խնդիր: Ինչ վերաբերում է անհետաձգելի բուժօգնության կարիք ունեցող անձանց, ապա այն տրամադրվում է անհապաղ, ըստ բժշկական ցուցման, մյուսների դեպքում կատարվում է հերթագրում: Սոցիալական փաթեթի շահառուների պետության կողմից երաշխավորված անվճար բժշկական օգնության և սպասարկման վերաբերյալ տեղեկատվություն ստանալու համար կարող եք զանգահարել ՀՀ ԱՆ պետական առողջապահական գործակալություն: Գործակալությունից էլ թվեցին այն բժշկական կենտրոնների անունները, որտեղից կարող է քաղաքացին օգտվել: «Եթե երկու ուղեգիր ունի հիվանդը, ապա  կարող է  դիմել այն բուժհաստատությունները, որոնք մատուցում են  սոցփաթեթի շահառուներին անհրաժեշտ ծառայությունը»,- մանրամասնեցին ՀՀ ԱՆ պետական առողջապահական գործակալությունից: 

Ինչ վերաբերում է  լիմիտը սպառվել է արտահայտությանը,  գործակալության աշխատակցի պարզաբանմամբ հիվանդանոցներում   համակարգչային ու մագնիսառեզոնանսային տոմոգրաֆիաների համար` որպես դժվար հետազոտություններ դեկտեմբերը ներառյալ տեղ չկա: Այսինքն` շահառուները դեկտեմբեր ամիսն էլ ներառյալ հերթագրվել են հիվանդանոցներում:

 ՀՀ ԱՆ պետական առողջապահական գործակալությունը հորդորում է սոցփաթեթներով շահառուներին խնդիրների դեպքում զանգահարել իրենց: 

Սոնա Դավթյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝