«ԲԻԼԱՅՆԻՑ» ԳԱՂՏՆԻ ՓԱՍՏԱԹՂԹԵ՞Ր ԵՆ ՏՎԵԼ «ՅՈՒՔՈՄԻ» ՂԵԿԱՎԱՐՈՒԹՅԱՆԸ

Հայտնի է, որ օրեր առաջ «Յուքոմի» հիմնադիրներն ու ղեկավար կազմը՝ շուրջ երկու հարյուր հիսուն աշխատակիցներով, հրաժարական են տվել եւ լքել ընկերությունը: Թե ինչն է նման սկանդալային կերպով հրապարակավ հրաժարականի պատճառը, դեռեւս հայտնի չէ: Կան միայն կցկտուր մեկնաբանություններ, սակայն հասկանալի է, որ այս ամենի տակ ինչ-որ խորը պատմություն կա: Շրջանառվող լուրերի համաձայն՝ հրաժարականների պատճառների մեջ անմասն չէ նաեւ «Բիլայնի» գործադիր տնօրեն Անդրեյ Պյատախինը: Մասնավորապես խոսվում է, որ Պյատախինը «Յուքոմի» բաժնետերերին է փոխանցել իր ղեկավարած ընկերության ներքին ինֆորմացիան, որպեսզի դրա դիմաց ստանա միավորվող ընկերության տնօրենի պաշտոնը: Վերոնշյալի շուրջ պարզաբանում ստանալու ակնկալիքով «Իրավունքը» նախ փորձեց հետաքրքրվել «Բիլայնի» գլխավոր գրասենյակից, որտեղից հարցը լսելուց հետո այս պատասխանը տվեցին՝ հրաժարվելով այլ մեկնաբանությունից. «Հայաստանում «Բիլայնի» գլխավոր տնօրեն Անդրեյ Պյատախինը շարունակում է զբաղեցնել իր պաշտոնը եւ չի նախատեսում լքել այն: Հայաստանում «Բիլայնը» շարունակում է աշխատել սովորականի պես՝ կատարելով իր պարտականությունները հաճախորդների եւ շահակիրների առջեւ»:

«Յուքոմի» հրաժարական տված ղեկավար Հայկ Եսայանը եւս մեզ հետ զրույցում նախ չցանկացավ որեւէ հարցի շուրջ մեկնաբանություն տալ, ապա խոստացավ մեր հեռախոսահամարը փոխանցել ոմն Աշոտի: Զանգահարեց, ներկայացավ, որպես «Յուքոմի» այլեւս նախկին լրատվականի պատասխանատու: Ասաց միայն, որ չեն մեկնաբանում տարածված լուրը: Սակայն մի քանի րոպե անց հաղորդագրության միջոցով տեղեկացրեց. «Ինֆորմացիան չի համապատասխանում իրականությանը»:

Իրո՞ք, բա ինչո՞ւ այդքան ծանր տարան այդ լուրը: Չնայած, աղբյուրը խոստանում է նաեւ մանրամասն տեղեկացնել, թե ինչ փաստաթղթերի մասին է խոսքը: Այնպես որ, այս պատմությունը դեռ շարունակություն կունենա:

ԻԼՈՆԱ ԱԶԱՐՅԱՆ