Ազգությամբ հայ ՌԴ քաղաքացին անհետացել է «Սեւան» ՔԿՀ-ի մոտից. նրան սպառնում են ադրբեջանցիները

Այսօր առեղծվածային դեպք է տեղի ունեցել «Սեւան» քրեակատարողական հիմնարկի հենց առջեւում: Բանտից ազատված ՌԴ քաղաքացի 36-ամյա Արթուր Էդուարդի Մարկոսյանցին հարազատներն այդպես էլ չեն կարողացել տուն տանել: Հորեղբայրը տեսել է, թե ինչպես են Ա. Մարկոսյանցին հանձնում իրերը, նա նույնիսկ ձեռքով է արել: Սակայն տեւական ժամանակ սպասելուց հետո, երբ հարցրել են ՔԿՀ-ից, թե որտեղ է նա, պատասխանել են, որ սեւ ապակիներով երկու մեքենա մոտեցել են ու տարել Երեւան: Մինչ այս պահը անհայտ է, թե որտեղ է գտնվում Ա. Մարկոսյանցը:

Հարազատներն անհանգստացած են: Դիմել են ՀՀ ԱԳՆ-ին, որտեղից դեռ պատասխան չեն ստացել, իսկ Մարդու իրավունքների պաշտպանի գրասենյակից հայտնել են, որ Ա. Մարկոսյանցին նորից կալանավորել են՝ Ռուսաստան արտահանձնելու համար: Ի՞նչ վիճակում է Ա. Մարկոսյանցը, արդյոք իրականում իրավապահներն են նրան տարել, թե քաղաքացիական անհայտ անձինք, ոչինչ հայտնի չէ:

Ա. Մարկոսյանցի հարազատներից հաջողվեց պարզել, որ Ռուսաստանում նա խնդիրներ է ունեցել ադրբեջանցիների հետ: Վերջինիս սպառնացել են, որ սպանելու են, քանի որ հայ է: Նրանք տեղափոխվել են Երեւան՝ հույս ունենալով, որ հայրենիքում կկարողանան լուծել խնդիրները, որովհետեւ նրա վրա խարդախության հոդվածով գործ են սարքել Ռուսաստանում:

«Դիմել էինք ՀՀ քաղաքացիություն ստանալու համար, քանի անգամ խնդրել էինք օգնություն Հայաստանից, բայց մերժել են: Նա նստել է բանտում խարդախության համար, հետո, երբ ստորագրությամբ ազատվել էր բանտից, փորձել էր սահմանն անցնել՝ կարծելով, թե կհասնի ընտանիքին, որովհետեւ ունի անչափահաս երեխաներ, որոնց շատ կարոտել էր, բայց հանձնվել է ԱԱԾ ծառայողներին, եւ այդ ժամկետն էլ է նստել: Չկա որեւէ բացատրություն, թե հիմա ինչ է լինելու: Ինչո՞վ է պայմանավորված այսպիսի գաղտնիությունը, չէ որ նա չի թաքնվել, հենց կալանավայրի առջեւից տարել են: Ես չգիտեմ՝ ի՞նչ անեմ», - «Իրավունքի» հետ զրույցում ասաց Ա. Մարկոսյանցի մայրը՝ տիկին Անժելան: Նա վստահ է՝ որդու կյանքին վտանգ է սպառնում, առավել եւս, եթե վերադարձնեն Ռուսաստան:

ՀՐԱՆՏ ՍԱՐԱՖՅԱՆ