ԿԱՐՃ ԼՈՒՐԵՐ

ՀՅԴ-ական պատգամավորը վրդովվել էր պրոգենդերներին հավասար

20.10.2017 19:41 ՕՐՎԱ ՊԱՏԿԵՐ ՔԱՂԱՔԱԿԱՆ ՀԱՆԴԻՊՈՒՄ
ՀՅԴ-ական պատգամավորը վրդովվել էր պրոգենդերներին հավասար

Հիշո՞ւմ եք, որ դեռեւս մեկ տարի առաջ «Իրավունքը» գրել էր, որ ժամանակին գենդերների դեմ պայքարող ՀՅԴ-ականները, որոշել են հիմա էլ հակառակ դիրքերից հանդես գալ: Նախ` ՀՅԴ-ի կողմից վերահսկվող հեռուստաընկերությունը ՊրոՄեդիա-Գենդեր հասարակական կազմակերպության հետ համագործակցությամբ` Հայաստանում սկսեց Մեծ Բրիտանիայի եւ Հյուսիսային Իռլանդիայի Միացյալ Թագավորության դեսպանատան եւ Հայաստանում Եվրոպական միության համաֆինանսավորմամբ` պատրաստել հաղորդումների շարք` «Գենդերային բռնության դեմ ակտիվիզմի 16 օր» միջազգային քարոզարշավի շրջանակներում: Այնուհետեւ` ԱԺ ՀՅԴ խմբակցության ղեկավար Արմեն Ռուստամյանը, Եվրախորհրդարանի «Սոցիալիստների եւ դեմոկրատների պրոգրեսիվ ալյանս» պատգամավորական խմբակցության հետ հուշագիր  ստորագրեց` պարտավորություն ստանձնելով, որ յուր կուսակցությունը պետք է նպաստի ՀՀ-ում միջազգային չափանիշներին համապատասխան հակախտրական օրենքի ընդունմանը: Ընդ որում` նույն այդ միջազգային չափանիշները ենթադրում էին նաեւ ԼԳԲՏ անձանց հանդեպ խտրականության բացառում: Ինչեւէ, այսօր պարզվում է, որ ստանձնած պարտավորությունների դիմաց, ՀՅԴ-ն դեռ շարունակում է ծառայություններ մատուցել պատվիրատուներին եւ ոչ թե ծառայել իր ընտրողներին: 

ՖԻՆԱՆՍԱՎՈՐՈՒՄՍ ԳԱՂՏՆԻ ԹՈՂ ՄՆԱ

Այս շաբաթ խորհրդարանում տեղի ունեցած «Ընտանեկան բռնության կանխարգելման եւ ընտանեկան բռնության ենթարկված անձանց պաշտպանության մասին» օրենքի նախագծի նախնական տարբերակի լսումների ժամանակ մեր աչքից չվրիպեց ԱԺ ՀՅԴ խմբակցության պատգամավոր ԱՐՄԵՆՈՒՀԻ ԿՅՈՒՐԵՂՅԱՆԻ վարքագիծը, որը բավական վրդովված դուրս եկավ ԱԺ դահլիճից, ապա զրույցի բռնվեց լսումներին ներկա ԼԳԲՏ ջատագով սփյուռքահայ Մարո Մաթոսյանի եւ վերջինիս թիմակիցների հետ, որը ժամանակին Հյուսիսային պողոտայում երկու աղջնակների լեսբի-սեքս էր բեմադրել: Ինչեւէ, թե ինչով էր պայմանավորված ընկեր Արմենուհու դժգոհությունը լսումներից, հետաքրքրվեցինք հենց նրանից:

– Անկեղծ ասած, այս լսումները, ճիշտ է, շատ կարեւոր էին, բայց էական քննարկում չեմ տեսնում: Պետք էր հասկանալ, պետք էր քննարկել, թե ընդհանրապես ինչ է բռնությունը, մենք այդ երեւույթները համարում ենք բռնությո՞ւն, թե` ոչ, պայքարելու պահանջ ունե՞նք բռնության դեմ, թե` ոչ, այստեղ է խնդիրը: Կանխարգելման մասին էր խոսքը, բայց կանխարգելման մասին չէր խոսվում: Իսկ ես գտնում եմ, որ այս օրենքը անհրաժեշտություն է, դրա պահանջն իրապես արդեն կա: Կանխարգելել նշանակում է նախ բացահայտել հիմնավորումները, թե ինչից է ծնվում բռնությունը, բայց ամեն ինչ բերել եւ պայմանավորել սոցիալ-տնտեսական վիճակով, սխալ է: Կան տարածված կարծրատիպեր, որոնք էլ դառնում են բռնության պատճառներից մեկը, այսինքն` պետք է բազմակողմանի ուսումնասիրություն: Միգուցե, նաեւ խնդիր ունենք` հանրությանը շատ իրազեկելու: Մինչդեռ հանրությունը շատ քիչ է լսում եւ լսում է հիմնականում միայն այն մարդկանց տեսանկյունից, ովքեր օրենքին դեմ են: Եվ հիմնականում դեմ արտահայտվողները խոսում են ոչ թե օրենքի էության մասին, այլ ասում են` այ, դուք ֆինանսավորվել եք այսինչ կազմակերպության կողմից, հասկանո՞ւմ եք այդպես էական բանավեճ չի լինի: Ես կողմ եմ այս օրինագծին:

ՀՅԴ-ԱԿԱՆ ՏՂԱՄԱՐԴԻԿ ՀՈԳԵԲԱՆԱԿԱՆ ԲՌՆՈՒԹՅԱ՞Ն ԵՆ ԵՆԹԱՐԿՎՈՒՄ 

– Տիկին Կյուրեղյան, օրինակ, Ձեզ համար ընկալելի՞ է նախագծում առկա ենթադրյալ տնտեսական, հոգեբանական բռնությունը:

– Ինձ համար, այո՛, ընկալելի է ե՛ւ տնտեսական, ե՛ւ հոգեբանական բռնությունը: Իհարկե, այս առումով մի բան էլ կցանկանայի հավելել` ընդհանրապես, խոսել ընտանեկան բռնության մասին` լինի տնտեսական, թե հոգեբանական, չի նշանակում խոսել միայն կանանց նկատմամբ բռնության մասին: Հասկանո՞ւմ եք, միգուցե տղամարդիկ էլ հոգեբանական ոչ պակաս բռնության են ենթարկվում: Ասում են չէ` դու էլ ինչ տղամարդ ես, որ այսինչ բանը չես կարողանում անել: Կա նաեւ տարածված կարծրատիպ, թե իսկական հայ տղամարդը այսպիսին պետք է լինի կամ այնպիսին, հենց սրանք էլ բերում է տղամարդու մեջ մի հոգեվիճակի, որ ինքը զգում է, թե իր վրա բնությունից տրված այդ դերն ի վիճակի չէ կատարել: Հենց դա էլ միգուցե դառնում է բռնություն ամուսնու նկատմամբ:

– Ամեն դեպքում, որպես ավանդական կուսակցության ներկայացուցիչ, չե՞ք կարծում, որ նման օրենքի նախագիծ գրելուց առաջ նախ պետք էր հաշվի առնել մեր ազգային առանձնահատկությունները:

– Ինչո՞ւ, մեր ազգային առանձնահատկությունը երբեւիցե բռնության կողմնակից չի եղել: Հակառակը` մեր ազգային առանձնահատկությունը միշտ ներդաշնակ ընտանիք ունենալու կողմնակիցն է եղել: Սա չպետք է մոռանանք, ավելին` մեր ազգային առանձնահատկությունը միշտ կարեւորել է ընտանիքում ներդաշնակ հարաբերությունները:

ԵՐԲ ՏԻԿԻՆ ՀՅԴ-ԱԿԱՆԻՆ ՀԱՆԳԻՍՏ ՉԻ ՏԱԼԻՍ ԳԵՆԴԵՐԱՅԻՆ ՀԱՎԱՍԱՐՈՒԹՅՈՒՆԸ

– Այս օրենսդրական նախագծով երրորդ անձը հանգիստ կարող է խառնվել ամենքիս ընտանիքների ներդաշնակ հարաբերությանը: Դուք սա նորմա՞լ եք համարում:  

– Դուք հիշեք Մխիթար Գոշի Սահմանադրությունը, որը դեռեւս 4-5-րդ դարում ասում էր` հայ կինը` հայ մանչու հետ ունի հավասար բոլոր իրավունքները: Եկեք չմոռանանք Մխիթար Գոշի Սահմանադրությունը, Շահամիր Շահամիրյանի Սահամանդրությունը` «Որոգայթ փառացը»: Մեր հայկական առանձնահատկությունները, ավանդույթները երբեւիցե կնոջ ու տղամարդու դերերի մեջ այդպիսի մեծ տարանջատում չեն դրել, այլ միշտ ներդաշնակ ընտանիքի կողմնակիցն են եղել:

– Բայց այս նախագծի հիմքում ո՛չ Մխիթար Գոշի, ո՛չ էլ Շահամիր Շահամիրյանի մտքերն են արտահայտված, այլ մի շարք փորձագետներ շեշտում են, որ այն Եվրոպայից է պարտադրված Հայաստանին...

– Գիտեք, ուրեմն` պետք է բանավեճը գնար այդ մեխանիզմների քննարկման շուրջ:

ՊԱՏԳԱՄԱՎՈՐՆ ԱՆՀԱՆԳՍՏԱՑԱԾ Է ԴԵՄ ԱՐՏԱՀԱՅՏՎՈՂՆԵՐԻ ՖԻՆԱՆՍԱՎՈՐՄԱՄԲ

– Ի վերջո, Դուք տեսնո՞ւմ եք այդ պարտադրանքը, որ փորձում են փաթաթել Հայաստանի վզին:

– Չեմ կարող ասել, պարտադրանք կա, թե` ոչ, ես, որպես այդպիսին, պարտադրանք չեմ տեսնում: Պարզապես, ինձ մոտ ուրիշ հարց է առաջանում` այդ օրենքի նախագծի դեմ խոսացողները, եթե կարեւորում են հայ ավանդական ընտանիքները, ինչո՞ւ չեն շատ ավելի ավանդույթները խախտող երեւույթների մասին այսպես աղմկոտ բարձրաձայնում: Ինձ մոտ էլ հարց է առաջանում` միգուցե իրենք էլ ֆինանսավորվել են մի ուրիշի՞ կողմից, որպեսզի այսպիսի ընդդդիմադիր աղմուկ բարձրացնեն:

– Կնշե՞ք մի դեպք, որը վերաբերել է կարեւորագույն ազգային արժեքների, ու դրա վերաբերյալ լռություն են պահպանել: 

– Ինձ համար, օրինակ, այսօր շատ ավելի ցավալի է խաղատների տարածումը, մեր երիտասարդությանը փորձում են գրավել խաղամոլության մոլուցքով: Այսօր մենք ինքնասպանություններ ունենք, որոնք հիմնականում երիտասարդներ են, եւ դրա պատճառները հենց խաղամոլությունն է` կապված պարտքերի հետ: Ինչո՞ւ չեն նրանք այս ամեն ինչի մասին այսպես արձագանքում: Եթե նրանք հայ ընտանիքի, հայ ավանդույթի, չգիտեմ, հայի զարգացման մասին են խոսում, ինձ մոտ էլ կարծիք է ծնվում, որ կրկնում եմ` իրենք էլ ֆինանսավորվում են այլ աղբյուրներից` ընդդիմադիր խոսելու համար: Այսքանը:

ՀՐԱՆՏ ՍԱՐԱՖՅԱՆ

 

КОМСОМОЛЬСКАЯ ПРАВДА