ԿԱՐՃ ԼՈՒՐԵՐ

Մարզական մի շարք ֆեդերացիաների և սպորտային հասարակական կազմակերպությունների համաժողով Երևանում

20.03.2017 21:01 ՕՐՎԱ ՊԱՏԿԵՐ
Մարզական մի շարք ֆեդերացիաների և սպորտային հասարակական կազմակերպությունների համաժողով Երևանում

Այսօր Երևանում` Մոսկվայի տան մեծ դահլիճում, տեղի ունեցավ մարզական մի շարք ֆեդերացիաների և սպորտային հասարակական կազմակերպությունների համաժողով, որին ներկա էին շուրջ երեք տասնյակ հասարակական կազմակերպությունների ներկայացուցիչներ:
Համաժողովին հրավիրվել էին ՀՀԿ գործադիր մարմնի ներկայացուցիչ, Երևանի քաղաքապետ Տարոն Մարգարյանը և ՀՀԿ խորհրդի անդամներ, Ազգային Ժողովի պատգամավորներ Արտակ Դավթյանը և Արտակ Զաքարյանը:
Համաժողովի ընթացքում քննարկվեցին ֆիզիկական կուլտուրայի և մասսայական սպորտի զարգացմանն առնչվող խնդիրներ, բարձրացվեցին մի շարք հարցեր, որոնք ապագայում պահանջում են պետական հոգածություն: Ելույթներով հանդես եկան ֆեդերացիաների և սպորտային կազմակերպությունների ներկայացուցիչներ:
Բարձրացված հարցերի և առաջարկությունների վերաբերյալ համաժողովում ելույթ ունեցավ նաև Տարոն Մարգարյանը: Անդրադառնալով մարզական ոլորտի խնդիրներին՝ Տարոն Մարգարյանը նշել է, որ մշակված հստակ ծրագրերի շրջանակում վերջին տարիներին մայրաքաղաքում զգալի աշխատանքներ են տարվել սպորտային կյանքի աշխուժացման ու մարզական օջախների պայմանների բարելավման ուղղությամբ:
«Այն հարցերը, որոնք բարձրացվեցին, իրականում խնդիրներ են, որոնք պահանջում են հետևողական լուծումներ: Բայց բոլորդ նաև կփաստեք, որ սպորտի զարգացմանն ուղղված մեր հետևողականությունը մենք կատարած աշխատանքով ենք ապացուցել: Երևանի քաղաքապետարանի ենթակայության սպորտդպրոցների մեծ մասն արդեն հիմնանորոգված է, ամենամյա աշխատանքներ են տարվում նաև մարզական գույքի թարմացման ուղղությամբ: Բայց այսքանով մենք չենք սահմանափակվելու և համոզված եղեք, որ բոլոր այն ծրագրերը, որոնք նախանշված են Հանրապետական կուսակցության նախընտրական ծրագրում, ևս կյանքի են կոչվելու և հետզհետե լուծումներ ենք տալու նաև սպորտի ոլորտի առջև ծառացած տասնամյակների խնդիրներին», - նշել է Տարոն Մարգարյանը:
Ավարտին համաժողովը հանդես եկավ համատեղ հայտարարությամբ, որում կոչ է արվում առաջիկա ընտրություններում աջակցել Հայաստանի Հանրապետական Կուսակցությանը:
Համաժողովի հայտարարությունը, որին միացել են համաժողովին ներկա բոլոր կազմակերպությունները, ներկայացնում ենք ստորև:

«Մասսայական սպորտի և ֆիզիկական կուլտուրայի զարգացման խնդիրները տարեցտարի ավելի ու ավելի են կարևորվում մեր հասարակության առողջության պահպանման, ֆիզիկական դաստիարակության, պետության պաշտպանունակության բարձրացման և առողջ հասարակության ձևավորման գործում: Պետության հոգածությունը, համայնքային և հասարակական մարզական կազմակերպությունների պրոֆեսիոնալիզմն ու հետևողական գործունեությունը կարևոր նախադրյալներ են այս հարցերում: Նախկինում իրականացված աշխատանքների և ցուցաբերած ուշադրության շնորհիվ հնարավոր է լուծումներ գտնել ոլորտի տարբեր խնդիրների համար: Զգալիորեն համալրվել է գույքային բազան, բարելավվել են տարբեր մարզական հաստատությունների պայմանները, ակտիվացել են ֆեդերացիաների աշխատանքները՝ ավելացնելով հասարակական ներգրավվածությունն ու հետաքրքրվածությունը սպորտի և ֆիզիկակական կուլտուրայի նկատմամբ:
Մենք գտնում ենք, որ հետագա տարիների համար, անհրաժեշտ է լինելու շարունակել ընդլայնել սպորտային խմբակներում և մարզադպրոցներում հանրության ընդգրկվածությունը: Ոլորտում մասսայականության ապահովման նպատակով պետք է կիրառվեն ֆինանսավորման նոր մոդելներ, որը պետք է հենված լինի պետական և համայնքային հաստատությունների, ինչպես նաև մասնավոր սեկտորի համագործակցության վրա: Անհրաժեշտ է նաև տարեցտարի վերանայել մարզչական կազմի աշխատավարձների հետ կապված խնդիրները:

Մենք՝ համաժողովի մասնակից ներքոստորագրյալ կազմակերպություններս,

• կարևորելով ՀՀ նոր սահմանադրությամբ խորհրդարանի ստանձնած լիազորությունները, ինչպես նաև նրա պատասխանատու ու որոշիչ դերակատարությունը մեր երկրի հանրային –պետական կյանքում,
• գնահատելով Հայաստանի Հանրապետական Կուսակցության գործունեությունն ու իրատեսական մոտեցումները մեր հասարակության առջև ծառացած խնդիրների լուծման գործում,
• ընդգծելով պետության անվտանգության ու առաջընթացի հարցերում մեր մասնագիտական և քաղաքացիական ջանքերը ներդնելու պատրաստակամությունը՝

− կոչ ենք անում առաջիկա խորհրդարանական ընտրություններում աջակցել և քվեարկել Հայաստանի Հանրապետական Կուսակցության ու նրա թեկնածուների օգտին»:

Հայտարարությունը ստորագրել են թվով 27 հասարակական կազմակերպություններ:

 

 

КОМСОМОЛЬСКАЯ ПРАВДА