ԿԱՐՃ ԼՈՒՐԵՐ

«Հանրապետականը մեկ խնդիր ունի` պայքարել հանուն երկրի անվտանգության ու առաջընթացի»

03.03.2017 19:40 ՔԱՂԱՔԱԿԱՆ ՀԱՆԴԻՊՈՒՄ
«Հանրապետականը մեկ խնդիր ունի` պայքարել հանուն երկրի անվտանգության ու առաջընթացի»

Ընդամենն օրեր անց պաշտոնապես կմեկնարկի ԱԺ ընտրությունների նախընտրական քարոզարշավը, ինչի վերաբերյալ «Իրավունքը» զրուցեց ԱԺ նախագահ ԳԱԼՈՒՍՏ ՍԱՀԱԿՅԱՆԻ հետ: Նրա գնահատմամբ` այս ընտրությունները պատվաբեր կարող են լինել մեր ազգի համար, քանի որ ընտրական պայքարում խախտումներ ընդհանրապես հնարավոր չէ կատարել:

«ԸՆՏՐԱԿԱՆ ԽԱԽՏՈՒՄՆԵՐ ՉԵՆ ԼԻՆԵԼՈՒ»

–Պարոն Սահակյան, դիտորդներ, դեսպաններ, այդ թվում եւ ՀՀ-ում ԱՄՆ դեսպան Միլսը խոսում են Հայաստանում ընտրակաշառք բաժանելու դեպքերի կանխման մասին: Սակայն, նույն ԱՄՆ նախագահի ընտրությունները ցույց տվեցին, որ եթե մեզանում կարող է մեկ-երկու նման դեպք լինել, ապա իրենց մոտ, օրինակ, ընտրողների 14 տոկոսը մահացածներն են եղել: Ի՞նչ կասեք այս մասին:

– Ոչ միայն ԱՄՆ-ում կա նման խնդիր, այլ ընդհանրապես` աշխարհն այդպիսին է: Երբ ընտրություններ են սկսվում, պատգամավորները սկսում են ինչ-որ ձեւով ժողովրդի համակրանքը շահել: Եվ գաղտնիք չէ, որ հնարավոր է նաեւ փող առաջարկեն: Երբ մեզ մոտ մեղադրանքներ են հնչում ընտրակաշառք բաժանելու մասին, սա ե՛ւ դրական է, ե՛ւ բացասական: Այսինքն` նշանակում է, որ ընտրական խախտումներ չեն լինելու եւ ընտրողներին, փաստորեն, պիտի կարողանան ներկայացնել մի մոդել, ինչի համար իրենց ձայն կտան: Հենց այդ իմաստն էլ փորձում են կաշառակերության վերագրել ու դրանով առաջ են շարժվում: Ավելին` ասում են, թե առաջադրված թեկնածուները բավականին լուրջ թվեր են ներկայացնում ընտրողներին, բայց եթե վերջին հաշվով նույնիսկ նման խնդիրներ էլ կան, ապա այս պահին դրանք կոռուպցիոն երեւույթներ չեն կարող լինել: Այլ բան է, երբ ընտրողին ասում ես` ինչո՞վ կարող եմ քեզ օգնել եւ բոլորովին այլ բան է, երբ արդեն կատարում ես այն, ինչը խոստացել ես: Ամեն դեպքում, այս պահին ընդհանրապես չկա որեւէ կոռուպցիոն երեւույթ: Թեպետ հնարավոր է, որ ընտրությունների մոտ շրջանում ինչ-որ դեպքեր պատահեն...

– Տպավորություն է, որ ռեյտինգային ընտրակարգը պատուհաս է դարձել խորհրդարանական ընտրությունների գլխին, մանավանդ` տեղի ունեցած մի քանի միջադեպերի ֆոնին: Ինչպե՞ս Դուք կգնահատեք իրավիճակը:  

– Սովորաբար, ընտրությունների շրջանում ոչ միայն Հայաստանում, այլ ընդհանրապես բախումներ տեղի են ունենում: Սա կապված է ոչ միայն մեր դիրքորոշումից, այլ առհասարակ քաղաքական դիրքորոշման խնդիր է: Կարծում եմ` պետք է որոշակիորեն մտածենք նաեւ այդ ուղղությամբ եւ փորձենք անել հնարավորինս, որպեսզի բախումներ չլինեն կամ գոնե մեծ ու ծավալուն չլինեն: 

«ԱՐՄԱՆ ՍԱՀԱԿՅԱՆԸ ԼՈՒՐՋ ԹԻՄ ՈՒՆԻ»

–Թիվ 2 ընտրատարածքից (ներառում է Արաբկիր, Աջափնյակ եւ Դավիթաշեն վարչական շրջանները) ռեյտինգային ընտրակարգով առաջադրվել է Ձեր որդին: Ըստ Ձեզ, ինչո՞վ է պայմանավորված, որ վերջին շրջանում մամուլում հենց Արման Սահակյանին են թիրախավորում:

– Կարծում եմ` այդ թիրախավորումն ավելի շատ իմ հանդեպ է արվում, եւ չեմ էլ ուզում որեւէ կերպ բնորոշել: Ասում են` Գալուստ Սահակյանի հարսը այսպիսի կամ այնպիսի բան է արել աշխատանքի ժամին` չմտածելով, թե ի՞նչ աշխատանքի ժամ, կամ ի՞նչ կապ ունի հարսը: Պարզապես, մտածում են, թե մի խոշոր զենք է իրենց համար այն, որ իմ որդին նաեւ պատգամավորի թեկնածու է դարձել: Պետք է ասեմ, որ հիմնականում երիտասարդների մեջ Արման Սահակյանը միակն է, որը բավականին լուրջ թիմ ունի եւ այն ծառայեցնում է իր կուսակցության նպատակներին: Սա է ընդամենը, եւ դրա համար էլ  ամեն ինչ ասում են ու անում, որպեսզի կարողանան ինչ-որ ձեւով ձայներ խլեն նրանից, բայց կարծում եմ` դա էլ չի ստացվի: 

– Ընտրություններից հետո, Ձեզ եւ Ձեր որդուն տեսնում եք Ազգային ժողովո՞ւմ, թե այնուամենայնիվ, մեկնումեկը կլինի գործադիրում:

– Շատ դժվար է պատասխանել, թե ինչ կլինի: Վերջին հաշվով ընտրություններից հետո քաղաքական թիմն է բաշխումներ կատարում: Ի դեպ, ասեմ, որ միեւնույն ժամանակ ես եւ իմ որդին արդեն եղել ենք ԱԺ պատգամավորներ: Իր պատգամավորության կարճ, կարծեմ` երկու տարվա ընթացքում, Արման Սահակյանը 10 օրենսդրական նախաձեռնություններով է հանդես եկել: Եվ այսօր էլ, երբ իր թեկնածությունն առաջադրել է, խնդիրը միայն այն չէ, որ խորհրդարանի պատգամավոր դառնա, այլ այն, որ ավելի մեծ ձայներ բերի Հանրապետականի համար:

– Իսկ Ձեր մասնակցությունը քարոզարշավին ի՞նչ ձեւաչափով է լինելու:

– Որպես Ազգային ժողովի ներկայացուցիչ` բոլոր դեպքերում մասնակցելու եմ քարոզարշավին` առավոտից մինչեւ երեկո:

«ՍԱ ՇԱՏ ՊՐԻՄԻՏԻՎ ԴԻՐՔՈՐՈՇՈՒՄ Է»

–Ի դեպ, այս շաբաթ ԱԺ քառօրյայի ընթացքում «Ծառուկյան դաշինքի» ներկայացուցիչ ԲՀԿ-ական պատգամավորները օգտագործելով առիթը, հայտարարում էին, թե թոշակների ու աշխատավարձերի բարձրացում են խոստանում իրենց նախընտրական ծրագրում...

– Սա շատ պրիմիտիվ դիրքորոշում է, մտածում են, թե ինչ ասեն, որ գան իշխանության, դրա համար էլ խոսում են թոշակներից, աշխատավարձերից: Բնականաբար, եթե այդ հնարավորությունները լինեին, քաղաքական այն ուժը, որն այսօր նաեւ իշխանություն է, վաղուց արդեն այդ խնդիրները լուծած կլիներ: Ըստ էության, չունենք այն բոլոր ռեզերվները, որով կարողանանք թոշակներ եւ աշխատավարձեր բարձրացնել: Բայց եթե այս ընտրությունները բարեհաջող անցնեն, հնարավորինս ժողովրդի հավատը դեպի իշխանություններն ավելի բարձրանա, կնպաստի, որպեսզի այն խնդիրները, որոնք դրվում են իշխանության կողմից, նաեւ ժողովուրդը դրան մասնակից դառնա:

– Երկրի սոցիալական վիճակից, կոռուպցիայից խոսում են նաեւ իշխանության նախկին ներկայացուցիչները, որոնք տեղավորվել են ՕՐՕ դաշինքում (ՊՆ նախկին նախարար Ս. Օհանյանն ու ԱԳ նախկին նախարարներ Վ. Օսկանյանն ու Ր. Հովհաննիսյանը): Ինչո՞ւ նրանք այդ մասին չէին խոսում, երբ իշխանության մաս էին կազմում:

– Երբ հարցնում են նրանց, թե իշխանության մեջ եք եղել եւ ինչու այն ժամանակ չէիք բարձրաձայնում խնդիրների մասին, ասում են, թե իշխանությունը լրիվ մերը չէր, որ կարողանայինք: Կարծում եմ` նույնիսկ եթե այսօր կամ վաղը որեւէ խնդիր լինի, եւ դրանում հենց ես մեղադրեմ իշխանություններին, որ չի կատարում, բնականաբար, կասեմ այդ մասին: Ու կցանկանայի, որ իրենք էլ այդպես մտածեին: Իշխանության մեջ ամենաբարձր պաշտոններին են եղել եւ հնարավորինս կկարողանային այդ խնդիրները բարձրացնել, մանավանդ եղել են կառավարության, անվտանգության խորհրդի անդամներ: Այնպես չէ, որ ամեն ինչը փակ է, եւ որեւէ բան չես կարող ներկայացնել: Այսօր էլ, երբ քաղաքական դաշտում, կոնկրետ ՀՀԿ-ում որեւէ խնդիր է քննարկվում, բնական է, ամեն մեկս մեր մտքերն ենք ասում եւ փորձում ուղիներ գտնել, որպեսզի այն, ինչի մասին խոսում ենք, իրագործվի:

– Պատերազմող երկրի համար «ճոխություն» չէ՞ր, որ պաշտպանության նախկին նախարարը հայտնվեց ընդդիմադիր դաշտում:

– Սովորաբար նա, ով իշխանավոր է եղել եւ պարտության այդ գործընթացներին չի մասնակցել, ընդդիմադիր դաշտում հայտնվելը մի տեսակ ոչ թե իմ, այլ ամբողջ հասարակության համար անհայտ մի ուղղություն է: Անհնար է, որ մարդ ամբողջ կյանքում իշխանության անդամ եղած լինի եւ հանկարծ մի գիշերվա մեջ ցանկանա ընդդիմություն լինել: Նույնիսկ այն իշխանությունը, որը ընտրությունների ժամանակ պարտվում է եւ գալիս է ընդդիմադիր դաշտ, բավականին երկար ժամանակ է անհրաժեշտ, որպեսզի կարողանա այդ դաշտին տիրապետել: Ըստ երույթին, մեզ մոտ նոր կուսակցություններ չեն առաջանում հենց այդ պատճառով, որովհետեւ ցանկացած իշխանավոր հետագայում դառնում է ընդդիմություն: Իսկ եթե այլ մեծ գաղափարներ ուներ, ինչո՞ւ ժամանակին չէր ընդդիմություն դարձել:

– Ընտրություններին ՀԱԿ-ը մասնակցում է Լեւոն Տեր-Պետրոսյանի հայտնի «Պատերազմ եւ խաղաղություն» թեզով` պնդելով, որ պետք է գնանք զիջուների ԼՂ հարցում: Մի՞թե սա խնդրի լուծման ճանապարհ է` հատկապես սահմանային լարվածության ֆոնին:

– ՀԱԿ-ի ներկայացուցիչները նաեւ Ազգային ժողովում հարց բարձրացրին, թե այնպիսի իրավիճակ է, որ պետք է լսումներ կազմակերպենք եւ մտածենք ինչ ենք անելու: Մենք դեմ ենք նման դիրքորոշմանը, եւ նորից կրկնում եմ` Ղարաբաղը երբեւէ Ադրբեջանի կազմում պիտի չլինի: ՀԱԿ-ն ասում է` որոշակի ըմբռնում ձեւակերպենք Ղարաբաղի համար, թեկուզ  ինչ-որ ձեւով Ադրբեջանի կազմում լինի, եւ հետագայում այդ խնդիրը կլուծենք` մոռանալով, որ եղած խնդիրը եթե ժամանակին չես լուծում, հետագայում լրիվ անհնարին է դառնալու: Մենք այդ ճանապարհով չենք գնալու, եւ այսօր ՀԱԿ-ը հենց այս թեզով է ընտրություններին մասնակցելու, որպեսզի տեսնի, թե մեր ժողովրդի քանի տոկոսը նման կարծիքի կողմնակից է: Բայց սա իրենց տեսակետն է եւ երբեք ու երբեք ոչ մերը: Այսօր Հանրապետականը մեկ խնդիր ունի` պայքարել հանուն մեր երկրի անվտանգության եւ առաջընթացի:

ՀՐԱՆՏ ՍԱՐԱՖՅԱՆ

 

КОМСОМОЛЬСКАЯ ПРАВДА