Վաղարշապատի մշակույթի պալատի աշխատակիցները մնացել են «օդում կախված»

Ինչպես արդեն գիտենք, Էջմիածնի համայնքապետարանն այլեւս վերանվանվել է Վաղարշապատ` պայմանավորված խոշորացված համայնք դառնալու հանգամանքով։ Դրանից հետո սկսվել է համայնքապետարանի ենթակայության տակ գտնվող բոլոր ՀՈԱԿ-ների լուծարման գործընթաց, այդ թվում` Կոմիտասի անվան մշակույթի պալատի:

Օրեր առաջ «Իրավունքը» հավաստի աղբյուրներից տեղեկացավ, որ Կոմիտասի անվան մշակույթի պալատ ՀՈԱԿ-ի աշխատակիցները հավուր պատշաճի չեն տեղեկացվել իրենց հետ աշխատանքային պայմանագիրը լուծարելու մասին: Թեպետ կազմակերպությունը ինչպես իրավաբանորեն, այնպես էլ փաստացի լուծարված է ս/թ մայիսի 30-ին, բայց չգիտես, թե ինչ պատճառաբանությամբ կամ ում աշխատանքային անփութության հետեւանքով` աշխատակիցներին պատշաճ կերպով եւ սահմանված ժամկետում չեն տեղեկացրել աշխատանքի այլեւս չներկայանալու մասին:
Փաստացի հունիսի 3-ը ներառյալ` բոլոր աշխատակիցները ներկայացել են աշխատանքի, չնայած` ոմանց հաստիքն այլեւս գոյություն չի ունեցել` մայիսի 30-ից հետո։ Սակայն սա դեռ մի կողմ: Պարզվում է` Վաղարշապատի համայնքապետարանին պատկանող Կոմիտասի անվան մշակույթի պալատի ներկայիս տնօրենի ԺՊ ՀԱՍՄԻԿ ԱԴԱՄՅԱՆՆ այս պահին երկրում չէ, ինչի մասին փաստում են ոչ միայն մեզ հասած լուրերը, այլ նաեւ սոցկայքում հրապարակած նրա լուսանկարները, թեպետ, ըստ օրենքի, դրա իրավունքը չուներ: Իսկ այս ընթացքում որոշ ընտրյալ աշխատակիցներ, անգամ ՀՈԱԿ-ի լուծարումից հետո, մինչ օրս, ամեն օր, առանց որեւէ հիմքի եւ աշխատանքային պայմանագրի` գնում են աշխատանքի` փաստացի շահագործվելով համայնքապետարանի կամ ՀՈԱԿ-ի կողմից: Ընդ որում` աշխատանքից ազատել են բարձրագույնավարտ երիտասարդ կադրերի:

Հարց է առաջանում` եթե ՀՈԱԿ-ն այս պահին լուծարված է, եւ որպես այդպիսին գոյություն չունի, ի՞նչ հիմքով են միջոցառումներ կազմակերպվում եւ անցկացվում մշակութային օջախում, եւ ինչո՞ւ են աշխատակիցներն առանց պայմանագրի կամ հրամանագրման` գալիս աշխատանքի, ինչպե՞ս է իրականացվելու աշխատավարձի վճարման իրավական գործընթացը: Արդյոք սա օրենքի կոպիտ խախտում չէ։ Այս եւ այլ հարցերի մասին մի քանի օր է` փորձում ենք պարզաբանում ստանալ Վաղարշապատի համայնքի ղեկավար ԴԻԱՆԱ ԳԱՍՊԱՐՅԱՆԻՑ, սակայն վերջինիս հետ ոչ մի կերպ չհաջողվեց կապ հաստատել: Հուսով ենք` պարզաբանումը չի ուշանա, այլապես ստացվում է աշխատողները ենթարկվում են աշխատանքային թրաֆիքինգի, վերջիններս չեն ուզում իրենց անունները հրապարակել` վախենալով գործատուի կողմից հետագայում թիրախավորվելուց։ Այնպես որ, մենք  հետեւողական ենք լինելու այս բոլոր հարցադրումների պատասխանները ստանալու հարցում:

Ի դեպ, հատկանշական է այն, որ ԺՊ Հասմիկ Ադամյանը անգլերենի մասնագետ է, իսկ թե ինչ աղերս ունի մշակույթի հետ` ղեկավարելով մի ամբողջ մշակութային օջախ, էջմիածնում բացարձակ չեն էլ զարմանում, քանի որ վերջինս Էջմիածին քաղաքի անձնագրային բաժնի նախկին պետ ԱՆԴՐԱՆԻԿ ԱԴԱՄՅԱՆԻ աղջիկն է, սկեսրայրն այժմ Վաղարշապատ համայնքի ավագանու անդամ է` ՆԵՐՍԵՍ ՄԵԼԻՔՅԱՆԸ, ավելին` ասում են` եղբայրը եւս բարձրաստիճան պաշտոնյա է: Հասմիկ Ադամյանի ամուր հենարանն է նաեւ Վաղարշապատ համայնքի մշակույթի եւ կրթության բաժնի պետ ԼԻԼԻԹ ՀԱԿՈԲՅԱՆԸ: Ահա այն ամենը, ինչ պետք է իմանալ խնամի, ծանոթ, բարեկամ չգրված օրենքի այսօրվա դրսեւորումների մասին:

ՀՐԱՆՏ ՍԱՐԱՖՅԱՆ

Այս թեմայով Ինձ համար  միայն ընտանեկան կյանքը շատ փոքր տարածք է. ՀԱՍՄԻԿ ԿԱՐԱՊԵՏՅԱՆ Նոյեմբերյան համայնքը, համայնքի ղեկավար կազմը, այդ թվում սահմանամերձ գյուղերի վարչական ղեկավարները, չեն աջակցում սահմանազատման գործընթացին. հայտարարություն Ես վստահում եմ պարոն Աշոտյանին եւ շատ եմ հարգում. Իրինա Գասպարյան Այսօր արդեն մտածում եմ հայրենիքից մեկնելու մասին. Հասմիկ Կարապետյան ՏՏ համայնքը կամաց-կամաց լքում է Հայաստանը