Դիմակները նետված են, պարոնա՛յք. Գրիգոր Բալասանյան

Թեմա 24 Մարտ, 2023 3:17

Ելույթ ունենալով ԱՄՆ Կոնգրեսի արտաքին հարաբերությունների հանձնաժողովում՝ ԱՄՆ պետքարտուղար Բլինքենը նշել է, որ պետք է պաշտպանել Ադրբեջանին, քանի որ նա երկար սահման ունի Իրանի հետ։ Այդ նպատակով Բլինքենը 700.000 դոլար է խնդրել ադրբեջանցի զինվորականների վերապատրաստման համար, ինչպես նաեւ առաջարկել է ամբողջությամբ չեղյալ հայտարարել 1992թ ընդունված Ազատության աջակցման ակտի 907-րդ ուղղումը։ Այս հայտարարությունը հանդիպել է սենատոր Բոբ Մենենդեսի դիմադրությանը, թե անկարելի է օգնել եւ զինել ագրեսոր պետությանը:

Անդրադառնալով վերոնշյալին՝ ԵՊՀ միջազգային հարաբերությունների եւ դիվանագիտության ամբիոնի դոցենտ, միջազգայնագետ ԳՐԻԳՈՐ ԲԱԼԱՍԱՆՅԱՆՆ ընդգծում է՝ դիմակները նետված են, պարոնա՛յք:

«Հիմա արդեն վերջնականապես պարզ է, թե ինչու է ԱՄՆ շահագրգռված հայ-ադրբեջանական խաղաղության պայմանագրի շուտափույթ ստորագրման մեջ։ Ադրբեջանական բանակը պետք է իր ողջ ուշադրությունը դարձնի Իրանին, ըստ որոշ աղբյուրների ցամաքային օպերացիան հենց նրա վրա է դրված՝ միաժամանակ վստահ լինելով, որ հայկական զինված ուժերը չեն հարձակվի իրենց վրա։ Իսկ Հայաստանն ունենալու է այլ դերակատարում։ Նա պետք է ապահովի հայ-իրանական սահմանի փակումը, երբ սկսվեն ռազմական գործողությունները։ Չէ որ դեռեւս 2018թ աշնանը ելույթ ունենալով ՀՀ ԱԺ-ում ՀՀ կառավարության ղեկավարը նշել էր, որ տեսականորեն հայ-իրանական սահմանը կարող է փակվել։ Հիմա պարզ է չէ՞ ինչ է կատարվում: Պարզ է չէ՞ ինչի համար էր շտապ Հայաստան ժամանել Իրանի ԱԳՆ փոխնախարարը։ Կարո՞ղ էր Բլինքենն այս մասին ավելի շուտ հայտարարել: Ո՛չ, քանի դեռ Հայաստանը պաշտոնապես չհայտարարեց, որ մտադիր է ստորագրել, այսպես կոչված, խաղաղության, իսկ իրականում նոր պատերազմի պայմանագիրը», - շեշտել է միջազգայնագետը։