Փոքրիկ Անգելինան անհետացել է. իրավապաշտպանը փակագծեր է բացում

Արդեն 2 օր է կորել է 1 տարեկան Անգելինա Վարդանյանը: Այս մասին ահազանգում է «Հանուն ժողովրդի բարեկեցության մարդասիրական եւ տնտեսական զարգացման» ՀԿ նախագահ, իրավապաշտպան Այսեր Իսայանը: Ըստ նրա, երեխայի մոր ընկերուհին փոքրիկին հանձնել է անծանոթ անձանց, որոնք իբր թե մոր կողմից են ուղարկված եղել, սակայն ճանապարհի կեսից երեխան անհետացել է։ Բրազիլական սերիալ հիշեցնող այս սարսափելի պատմության մանրամասները «Իրավունքը» փորձեց պարզել ոստիկանությանը հաղորդում ներկայացրած իրավապաշտպանից:

- Պարոն Իսայան, ո՞ւր էին երեխայի ծնողները, ինչպե՞ս կարող էր 1 տարեկան երեխան հայտնվել նախ մոր ընկերուհու, ապա անծանոթ անձանց մոտ:

- Մոտավորապես վեց ամիս առաջ Անգելինա Վարդանյանի մայրը՝ Սիսավան գյուղի բնակիչ Լիլիթ Վարդանյանը երեխային թողնում է ընկերուհու՝ Եղեգնավան գյուղի բնակիչ Սաթեն Ստեփանյանի խնամակալությանն, ինքն էլ իբր գնում է արտերկիր՝ աշխատելու: Իսկ մի երեք օր առաջ երեխային Սաթեն Ստեփանյանի մոտից վերցնելու են գալիս ինչ-որ մարդիկ՝ իբր ներկայանալով Անգելինայի մոր, թե քեռու անունից: Սաթեն Ստեփանյանն էլ  առանց որեւէ ճշտում անելու 1 տարեկան երեխային, որը վեց ամիս եղել է իր խնամակալության տակ, թողնում է, որ Անգելինային տանեն, իբրեւ մոր մոտ: Ընդ որում՝ ըստ Սաթեն Ստեփանյանի ներկայացրածի, ճանապարհի վրա ինչ-որ մեքենա է կտրել իրենց առաջն ու վերցրել երեխային եւ գնացել:

- Ինչո՞ւ մեծ աղմուկ չեն բարձրացրել, ինչպե՞ս եք Դուք տեղեկացել այս մասին:

- Իրենք որոշել են, որ մի երկու-երեք օր կարելի է ոստիկանությանը տեղյակ չպահել: Սաթեն Ստեփանյանի ընտանիքին աջակցություն է ցուցաբերում մեր կազմակերպության բարեգործական խումբը, որի պատասխանատուն Ազո Բրոյանն է: Նա տեղյակ էր երեխայից եւ մի քանի ամսվա էլ սնունդ է նախորոք տարել այդ ընտանիքին, որպեսզի հոգսերը կարողանան հոգալ: Բայց երբ Ազո Բրոյանը տեղեկանում է, որ երեխան չկա, խնդրում է, որ տրամադրեն Եղեգնավանի ղեկավար Դավիթ Մեհրաբյանի համարը: Սակայն, Սաթեն Ստեփանյանը որոշակի դիտավորությունից ելնելով չի տալիս: Իսկ երբ Ազո Բրոյանն ասում է, որ կդիմի ոստիկանություն, այդ ժամանակ նոր հեռախոսահամարը փոխանցում է եւ նա տեղեկացնում է Դավիթ Մեհրաբյանին, թե ինչ է կատարվում: Հետո արդեն Ազո Բրոյանը ինձ տեղեկացրեց եւ զանգահարեցինք 1.02: Խոսել ենք Վեդիի ոստիկանության բաժնի աշխատակցի հետ: Շատ կարեւոր է հանրության ուշադրությունը գրավել այս փաստի վրա, որ հանկարծ երեխան, Աստված չանի, չեմ էլ ուզում ասել, թե ինչ ճակատագրի չարժանանա:

- Իսկ հնարավոր չէ՞, որ երեխայի, օրինակ, հայրը վերցրած լինի նրան:

- Նախ այս պահի դրությամբ՝ երեխայի հորից ոչ մի տեղեկատվություն չունենք: Մենք խնդրել ենք ոստիկանությանը, որպեսզի ճշտեն այդ ամենը: Երեխայի փաստաթղթերը՝ ծննդյան վկայական, սոցքարտ եւ այլն, գտնվում է «խնամակալ» Սաթեն Ստեփանյանի մոտ:

- Փոքրիկի մայրն արդեն վերադարձե՞լ է արտերկրից, տեղյա՞կ է, թե ինչ է կատարվել:

- Մորից ոչ մեկ որեւէ տեղեկատվություն չունի: Այն հեռախոսահամարը, որը իբր պատկանում էր Լիլիթ Վարդանյանին, անջատված է: Հայաստան իրականում վերադարձել է, թե՝ ոչ, որեւէ մեկը չգիտի: Սակայն, փաստ է, որ եթե անգամ վերադարձել է Հայաստան, ապա չի գնացել նույնիսկ ընկերուհուն ասելու՝ շնորհակալություն, որ արդեն վեց ամիս է երեխուս պահում ես: Այստեղ, ուղղակի, հանցագործության հոտ է գալիս: Ամեն ինչ անում ենք, որպեսզի գտնենք երեխային: Եթե հոր մոտ է, շատ բարի, եթե մոր մոտ է, ուրեմն՝ հետեւողական ենք լինելու, որ նրան զրկեն ծնողական իրավունքներից եւ երեխային հանձնեն հատուկ կառույցներին, ովքեր կզբաղվում նրա խնամակալությամբ, որ ձեռքից ձեռք չանցնի: Ո՞վ գիտի, թե այս վեց ամսվա ընթացքում տվյալ «խնամակալն» ինչպես է վերաբերվել երեխային, որովհետեւ մեզ հասել են որոշ խոսակցություններ, ինչը բավական մտահոգիչ է:

ՀՐԱՆՏ ՍԱՐԱՖՅԱՆ